‎1 ‏חֲז֖וֹן עֹֽבַדְיָ֑ה כֹּֽה־אָמַר֩ אֲדֹנָ֨י יְהוִ֜ה לֶאֱד֗וֹם שְׁמוּעָ֨ה שָׁמַ֜עְנוּ מֵאֵ֤ת יְהוָה֙ וְצִיר֙ בַּגּוֹיִ֣ם שֻׁלָּ֔ח ק֛וּמוּ וְנָק֥וּמָה עָלֶ֖יהָ לַמִּלְחָמָֽה׃

‎2 ‏הִנֵּ֥ה קָטֹ֛ן נְתַתִּ֖יךָ בַּגּוֹיִ֑ם בָּז֥וּי אַתָּ֖ה מְאֹֽד׃

‎3 ‏זְד֤וֹן לִבְּךָ֙ הִשִּׁיאֶ֔ךָ שֹׁכְנִ֥י בְחַגְוֵי־סֶּ֖לַע מְר֣וֹם שִׁבְתּ֑וֹ אֹמֵ֣ר בְּלִבּ֔וֹ מִ֥י יוֹרִדֵ֖נִי אָֽרֶץ׃

‎4 ‏אִם־תַּגְבִּ֣יהַּ כַּנֶּ֔שֶׁר וְאִם־בֵּ֥ין כּֽוֹכָבִ֖ים שִׂ֣ים קִנֶּ֑ךָ מִשָּׁ֥ם אוֹרִֽידְךָ֖ נְאֻם־יְהוָֽה׃

‎5 ‏אִם־גַּנָּבִ֤ים בָּאֽוּ־לְךָ֙ אִם־שׁ֣וֹדְדֵי לַ֔יְלָה אֵ֣יךְ נִדְמֵ֔יתָה הֲל֥וֹא יִגְנְב֖וּ דַּיָּ֑ם אִם־בֹּֽצְרִים֙ בָּ֣אוּ לָ֔ךְ הֲל֖וֹא יַשְׁאִ֥ירוּ עֹלֵלֽוֹת׃

‎6 ‏אֵ֚יךְ נֶחְפְּשׂ֣וּ עֵשָׂ֔ו נִבְע֖וּ מַצְפֻּנָֽיו׃

‎7 ‏עַֽד־הַגְּב֣וּל שִׁלְּח֗וּךָ כֹּ֚ל אַנְשֵׁ֣י בְרִיתֶ֔ךָ הִשִּׁיא֛וּךָ יָכְל֥וּ לְךָ֖ אַנְשֵׁ֣י שְׁלֹמֶ֑ךָ לַחְמְךָ֗ יָשִׂ֤ימוּ מָזוֹר֙ תַּחְתֶּ֔יךָ אֵ֥ין תְּבוּנָ֖ה בּֽוֹ׃

‎8 ‏הֲל֛וֹא בַּיּ֥וֹם הַה֖וּא נְאֻם¹ יְהוָ֑ה וְהַאֲבַדְתִּ֤י חֲכָמִים֙ מֵֽאֱד֔וֹם וּתְבוּנָ֖ה מֵהַ֥ר עֵשָֽׂו׃

‎9 ‏וְחַתּ֥וּ גִבּוֹרֶ֖יךָ תֵּימָ֑ן לְמַ֧עַן יִכָּֽרֶת־אִ֛ישׁ מֵהַ֥ר עֵשָׂ֖ו מִקָּֽטֶל׃

‎10 ‏מֵחֲמַ֛ס אָחִ֥יךָ יַעֲקֹ֖ב תְּכַסְּךָ֣ בוּשָׁ֑ה וְנִכְרַ֖תָּ לְעוֹלָֽם׃

‎11 ‏בְּיוֹם֙ עֲמָֽדְךָ֣ מִנֶּ֔גֶד בְּי֛וֹם שְׁב֥וֹת זָרִ֖ים חֵיל֑וֹ וְנָכְרִ֞ים בָּ֣אוּ שערו שְׁעָרָ֗יו וְעַל־יְרוּשָׁלִַ֙ם֙ יַדּ֣וּ גוֹרָ֔ל גַּם־אַתָּ֖ה כְּאַחַ֥ד מֵהֶֽם׃

‎12 ‏וְאַל־תֵּ֤רֶא בְיוֹם־אָחִ֙יךָ֙ בְּי֣וֹם נָכְר֔וֹ וְאַל־תִּשְׂמַ֥ח לִבְנֵֽי־יְהוּדָ֖ה בְּי֣וֹם אָבְדָ֑ם וְאַל־תַּגְדֵּ֥ל פִּ֖יךָ בְּי֥וֹם צָרָֽה׃

‎13 ‏אַל־תָּב֤וֹא בְשַֽׁעַר־עַמִּי֙ בְּי֣וֹם אֵידָ֔ם אַל־תֵּ֧רֶא גַם־אַתָּ֛ה בְּרָעָת֖וֹ בְּי֣וֹם אֵיד֑וֹ וְאַל־תִּשְׁלַ֥חְנָה בְחֵיל֖וֹ בְּי֥וֹם אֵידֽוֹ׃

‎14 ‏וְאַֽל־תַּעֲמֹד֙ עַל־הַפֶּ֔רֶק לְהַכְרִ֖ית אֶת־פְּלִיטָ֑יו וְאַל־תַּסְגֵּ֥ר שְׂרִידָ֖יו בְּי֥וֹם צָרָֽה׃

‎15 ‏כִּֽי־קָר֥וֹב יוֹם־יְהוָ֖ה עַל־כָּל־הַגּוֹיִ֑ם כַּאֲשֶׁ֤ר עָשִׂ֙יתָ֙ יֵעָ֣שֶׂה לָּ֔ךְ גְּמֻלְךָ֖ יָשׁ֥וּב בְּרֹאשֶֽׁךָ׃

‎16 ‏כִּ֗י כַּֽאֲשֶׁ֤ר שְׁתִיתֶם֙ עַל־הַ֣ר קָדְשִׁ֔י יִשְׁתּ֥וּ כָֽל־הַגּוֹיִ֖ם תָּמִ֑יד וְשָׁת֣וּ וְלָע֔וּ וְהָי֖וּ כְּל֥וֹא הָיֽוּ׃

‎17 ‏וּבְהַ֥ר צִיּ֛וֹן תִּהְיֶ֥ה פְלֵיטָ֖ה וְהָ֣יָה קֹ֑דֶשׁ וְיָֽרְשׁוּ֙¹ בֵּ֣ית יַֽעֲקֹ֔ב אֵ֖ת מוֹרָֽשֵׁיהֶם׃¹

‎18 ‏וְהָיָה֩ בֵית־יַעֲקֹ֨ב אֵ֜שׁ וּבֵ֧ית יוֹסֵ֣ף לֶהָבָ֗ה וּבֵ֤ית עֵשָׂו֙ לְקַ֔שׁ וְדָלְק֥וּ בָהֶ֖ם וַאֲכָל֑וּם וְלֹֽא־יִֽהְיֶ֤ה³ שָׂרִיד֙ לְבֵ֣ית עֵשָׂ֔ו כִּ֥י יְהוָ֖ה דִּבֵּֽר׃

‎19 ‏וְיָרְשׁ֨וּ הַנֶּ֜גֶב אֶת־הַ֣ר עֵשָׂ֗ו וְהַשְּׁפֵלָה֙ אֶת־פְּלִשְׁתִּ֔ים וְיָרְשׁוּ֙ אֶת־שְׂדֵ֣ה אֶפְרַ֔יִם וְאֵ֖ת שְׂדֵ֣ה שֹׁמְר֑וֹן וּבִנְיָמִ֖ן אֶת־הַגִּלְעָֽד׃

‎20 ‏וְגָלֻ֣ת הַֽחֵל־הַ֠זֶּה לִבְנֵ֨י יִשְׂרָאֵ֤ל אֲשֶֽׁר־כְּנַעֲנִים֙ עַד־צָ֣רְפַ֔ת וְגָלֻ֥ת יְרוּשָׁלִַ֖ם אֲשֶׁ֣ר בִּסְפָרַ֑ד יִֽרְשׁ֕וּ אֵ֖ת עָרֵ֥י הַנֶּֽגֶב׃

‎21 ‏וְעָל֤וּ מֽוֹשִׁעִים֙ בְּהַ֣ר צִיּ֔וֹן לִשְׁפֹּ֖ט אֶת־הַ֣ר עֵשָׂ֑ו וְהָיְתָ֥ה לַֽיהוָ֖ה הַמְּלוּכָֽה׃

1 ḥăzwōn ‘ōḇaḏəyâ kōh-’āmar ’ăḏōnāy yəhwih le’ĕḏwōm šəmû‘â šām^a‘ənû mē’ēṯ yəhwâ wəṣîr bagwōyim šullāḥ qûmû wənāqûmâ ‘āleyhā lammiləḥāmâ:

2 hinnēh qāṭōn nəṯatîḵā bagwōyim bāzûy ’atâ mə’ōḏ:

3 zəḏwōn libəḵā hiššî’eḵā šōḵənî ḇəḥaḡəwê-ssel^a‘ mərwōm šiḇətwō ’ōmēr bəlibwō mî ywōriḏēnî ’āreṣ:

4 ’im-taḡəbîhha kannešer wə’im-bên kwōḵāḇîm śîm qinneḵā miššām ’wōrîḏəḵā nə’um-yəhwâ:

5 ’im-gannāḇîm bā’û-ləḵā ’im-šwōḏəḏê layəlâ ’êḵə niḏəmêṯâ hălwō’ yiḡənəḇû dayyām ’im-bōṣərîm bā’û lāḵə hălwō’ yašə’îrû ‘ōlēlwōṯ:

6 ’êḵə neḥəpəśû ‘ēśāw niḇə‘û maṣəpunāyw:

7 ‘aḏ-hagəḇûl šilləḥûḵā kōl ’anəšê ḇərîṯeḵā hiššî’ûḵā yāḵəlû ləḵā ’anəšê šəlōmeḵā l^aḥəməḵā yāśîmû māzwōr t^aḥəteyḵā ’ên təḇûnâ bwō:

8 hălwō’ bayywōm hahû’ nə’um¹ yəhwâ wəha’ăḇaḏətî ḥăḵāmîm mē’ĕḏwōm ûṯəḇûnâ mēhar ‘ēśāw:

9 wəḥatû ḡibwōreyḵā têmān ləm^a‘an yikāreṯ-’îš mēhar ‘ēśāw miqqāṭel:

10 mēḥămas ’āḥîḵā y^a‘ăqōḇ təḵassəḵā ḇûšâ wəniḵəratā lə‘wōlām:

11 bəywōm ‘ămāḏəḵā minneḡeḏ bəywōm šəḇwōṯ zārîm ḥêlwō wənāḵərîm bā’û š^a‘ărwō šə‘ārāyw wə‘al-yərûšālaim yadû ḡwōrāl gam-’atâ kə’^aḥaḏ mēhem:

12 wə’al-tēre’ ḇəywōm-’āḥîḵā bəywōm nāḵərwō wə’al-tiśəm^aḥ liḇənê-yəhûḏâ bəywōm ’āḇəḏām wə’al-taḡədēl pîḵā bəywōm ṣārâ:

13 ’al-tāḇwō’ ḇəš^a‘ar-‘ammî bəywōm ’êḏām ’al-tēre’ ḡam-’atâ bərā‘āṯwō bəywōm ’êḏwō wə’al-tišəl^aḥənâ ḇəḥêlwō bəywōm ’êḏwō:

14 wə’al-t^a‘ămōḏ ‘al-hapereq ləhaḵərîṯ ’eṯ-pəlîṭāyw wə’al-tasəgēr śərîḏāyw bəywōm ṣārâ:

15 kî-qārwōḇ ywōm-yəhwâ ‘al-kāl-hagwōyim ka’ăšer ‘āśîṯā yē‘āśeh llāḵə gəmuləḵā yāšûḇ bərō’šeḵā:

16 kî ka’ăšer šəṯîṯem ‘al-har qāḏəšî yišətû ḵāl-hagwōyim tāmîḏ wəšāṯû wəlā‘û wəhāyû kəlwō’ hāyû:

17 ûḇəhar ṣîywōn tihəyeh fəlêṭâ wəhāyâ qōḏeš wəyārəšû¹ bêṯ y^a‘ăqōḇ ’ēṯ mwōrāšêhem:¹

18 wəhāyâ ḇêṯ-y^a‘ăqōḇ ’ēš ûḇêṯ ywōsēf lehāḇâ ûḇêṯ ‘ēśāw ləqaš wəḏāləqû ḇâem wa’ăḵālûm wəlō’-yihəyeh³ śārîḏ ləḇêṯ ‘ēśāw kî yəhwâ dibēr:

19 wəyārəšû hanneḡeḇ ’eṯ-har ‘ēśāw wəhaššəfēlâ ’eṯ-pəlišətîm wəyārəšû ’eṯ-śəḏēh ’efərayim wə’ēṯ śəḏēh šōmərwōn ûḇinəyāmin ’eṯ-hagilə‘āḏ:

20 wəḡāluṯ h^aḥēl-hazzeh liḇənê yiśərā’ēl ’ăšer-kən^a‘ănîm ‘aḏ-ṣārəfaṯ wəḡāluṯ yərûšālaim ’ăšer bisəfāraḏ yirəšû ’ēṯ ‘ārê hanneḡeḇ:

21 wə‘ālû mwōši‘îm bəhar ṣîywōn lišəpōṭ ’eṯ-har ‘ēśāw wəhāyəṯâ layhwâ hamməlûḵâ: